我也不想這樣

好多 designer 會埋怨，點解成日俾人改設計，即使係一份簡單到冇得再簡單既稿都可以改十幾次。 改動內容由大體設計、用色、排位、字款、字體大細、線條、公仔… 連紙質厚薄都可以成為改動對象。

幾乎可以肯定，designer 係全世界最識 version control 嘅一種人，連 programmer 都冇佢地咁勁。 「我想要今個月 2 號個版本隻字款不過改大D再搭落上個月 30 號個版本個 layout 但 margin 改多少少再加上星期三個 background color…」
情況就好似你去茶餐廳叫「乾炒牛河整濕小小走牛肉餐湯要白湯加少少雜菜餐飲要熱咖啡加冰」一樣，俾你玩死。

點解可以改咁多次？點解可以改完又改？無它嘅，唔改，又點顯得出班阿哥阿姐「有做嘢」？

老細俾份稿你，叫你「望下有冇問題」，哦，ok，文容冇錯丫，個 design 又夾番公司個 image，所有 data 都正確，同個 draft 一樣。 冇問題啦，交貨。然後俾老細狂噴︰「呢隻字冇 align center，嗰度條線唔對稱，呢部分太吉太少嘢…（下刪萬九字）」喂，大佬，人哋唔 align center 呢個好似係 design 嚟喎，唔好以為所有字都要 align center 先得架。留白呀，中國傳統藝術風格嚟架。

如是者試得幾次，俾人噴得幾鑊，咪喇，見到任何「不規則」都改左先，靚唔靚事少，份工事大嘛。

所以，任何俾老細過目既野，想靚，好難喇。