（前言︰這篇文章概念源自某網絡笑話， 再加上本人大量修改和僭建而成， 亦曾於以前任職之雜誌上刊出， 所以如果你看過篇文章的話， 可能已可知道本人曾任職那本雜誌了）
當你渴望成為一名攝影大 C， 當然唔可能用部 snap shot dc 機仔見人， 事關你知道︰相機跟男人的那話兒其實一樣，size does matter。有幾勁唔緊要，有幾大先至係重點。而一般 snap shot dc 越細部越好，絕對唔適合。
於是， 你花一大舊錢買部單鏡反光機返來， 頭兩日你影得好開心， 因為部機的確係︰ 勁。 之但係過多幾日你會發現︰ 冇枝外閃的話其實影室內好多時會炒粉。 於是熱心的你就花多幾千銀買多枝外閃。 再過多幾日， 你發覺就咁影相的話張相其實冇乜特別， 於是你發覺鏡頭係一個好重要因素之一， 而隨機套 kit lens 又有點兒雞肋， 於是為了玩焦距， 你決定花多幾千銀買支鏡。
過了一段風平靜的日子後， 你開始嫌棄舊鏡頭， 事關你認為佢質素太低。 你有一日午夜夢迴見到有一枝鏡一次過滿足你 N 個願望， 唔食唔痾幾個月後你終於儲夠錢， 買起支夢中情人。 試拍報紙同埋磚牆的結果表明呢支高素質鏡頭果然不負眾望。 好可惜影多幾影， 你就發現呢支貴幾倍又重幾倍的高質鏡頭同你原本支低質鏡頭無乜分別。 畢竟平時影風景用細光圈多， 聚焦不實的時候其用乜鏡頭都不清楚。 至於影人， MODEL 心情差質素低的時候其實點影都依然咁難睇。
已花費巨額買單鏡反光機、 燈、 鏡頭… 等等， 但為甚麼影出來的效果仍然和一部傻瓜機無分別呢？ 點算？
於是，你開始懷疑可能係支 PRO [...]
