十大關於 Marketing 部門的謬誤

公司內部對 marketing 呢個部門永遠有好多誤解，部分列出如下︰

1. 雖然話 marketing 負責公司對外及對內溝通，但唔代表我哋會知道各部門同事既人工， 所以唔好向我哋打聽， 我哋唔知， 除非你自爆你幾錢人工啦
2. Marketing 同其他部門一樣係有限 budget， 如果公司等錢使的話， 我哋唔會有優待可以有多舊錢去賣廣告嘅， 所以唔使眼紅喇， 你窮， 我哋仲窮
3. 唔係每一件產品都適合賣電視 / 雜誌廣告， 公司亦唔係長期都有錢有資源去賣電視 / 雜誌廣告。 所以當見午夜夢迴睇電視唔到公司廣告嘅時候， 唔好話我地冇做野， 有樣嘢叫做「below the line」， 呢樣嘢， 仲花時間過賣廣告
4. 唔好問點解個廣告要咁樣 sell 法， 你老細（即係我老細）叫到， 冇辦法， 已經向佢爭取咗好耐， 改善左喇， 你未見過佢提出黎嘅所謂 idea 咋， 嚇Q死你呀
5. Marketing 工作範圍並不包括訂文具 / 大量影印， 有關服務請向 admin 查詢
6. Marketing 工作範圍並不包括計算公司盈利（如有）， 有關八卦趣聞請向會計部查詢
7. Marketing 工作範圍並不包括送件俾「你個客」， 有關服務請向聯邦契遞查詢
8. 當你拎其他公司嘅宣傳品 / premium 嚟問我哋成本要幾錢， 需知道， 成本係好視乎你做幾多件嘅， 如果你想「tailor-make 幾件」俾你個超級大客， 成本係會好貴， 你傾完單 「超級大 deal」 所賺嘅錢可能唔夠找呢條數
9. 唔好成日話 「唔知 marketing 日日喺度做乜」， 正如好多人都「唔知 sales 日日喺度做乜」 / 「唔知 R&D 日日喺度做乜」
10. 我哋都唔想成日玩捉錯處遊戲， 但如果你連出張單都放錯公司 logo， 身為 marketing 係有責任叉你嘅

Sales 呀 Sales (III)

（主角係第二集呢位仁兄）
（電話對話）

Sales︰喂， 阿乜生呀， 上次同你傾個計劃呢進行成點呀？
我︰Sorry 呀公司都係決定暫時唔做住喇
Sales︰吓點解呀？
我︰因為大家都覺得成效有限…
Sales︰吓， 需唔需要我上黎同你老闆傾下個計劃？
我︰唔需要， 因為喺初步階段已經否決左喇。
Sales︰你個 manager 係邊位呀？
我︰…咩話？
Sales︰你個上司… 姓乜架？
我︰… 唔知喎
Sales︰咁你老闆姓乜架？
我︰陳
Sales︰佢幾多號電話呀？
我︰咩幾多號呀？
Sales︰我想打俾佢傾下個計劃
我︰佢唔聽電話架喎
Sales︰…（收線）

我也不想這樣

好多 designer 會埋怨，點解成日俾人改設計，即使係一份簡單到冇得再簡單既稿都可以改十幾次。 改動內容由大體設計、用色、排位、字款、字體大細、線條、公仔… 連紙質厚薄都可以成為改動對象。

幾乎可以肯定，designer 係全世界最識 version control 嘅一種人，連 programmer 都冇佢地咁勁。 「我想要今個月 2 號個版本隻字款不過改大D再搭落上個月 30 號個版本個 layout 但 margin 改多少少再加上星期三個 background color…」
情況就好似你去茶餐廳叫「乾炒牛河整濕小小走牛肉餐湯要白湯加少少雜菜餐飲要熱咖啡加冰」一樣，俾你玩死。

點解可以改咁多次？點解可以改完又改？無它嘅，唔改，又點顯得出班阿哥阿姐「有做嘢」？

老細俾份稿你，叫你「望下有冇問題」，哦，ok，文容冇錯丫，個 design 又夾番公司個 image，所有 data 都正確，同個 draft 一樣。 冇問題啦，交貨。然後俾老細狂噴︰「呢隻字冇 align center，嗰度條線唔對稱，呢部分太吉太少嘢…（下刪萬九字）」喂，大佬，人哋唔 align center 呢個好似係 design 嚟喎，唔好以為所有字都要 align center 先得架。留白呀，中國傳統藝術風格嚟架。

如是者試得幾次，俾人噴得幾鑊，咪喇，見到任何「不規則」都改左先，靚唔靚事少，份工事大嘛。

所以，任何俾老細過目既野，想靚，好難喇。

Sale 屎呀 Sale 屎 (II)

* S=Sales

第一日

S: 我想向你哋介紹關於 yahoo search marketing 既嘢…
我: 其實我知道呢個係乜黎既，我手頭上都有呢方面既資料，你哋 provide 到既嘢係（下刪九百字）係咪？
S: 係呀，不如約個時間我上黎同你再講啦
我: 不如咁啦，既然我都清楚你哋服務，不如簡單D，你 email 個 quotation 俾我再講啦。
S: 你就咁問我拎 quotation 的話我可能好耐都俾唔到你喎… 你哋之前係咪有用過呢類服務？
我: 係有，不過因為價錢同成效問題，所以後來 cut 咗
S: 咁係因為你唔了解個詳情啫，我哋都係約個時間上黎傾啦
我: 好， 聽日十點
S: 好，咁我聽日上黎同你 finalize 佢
我: （心諗: 我哋未開始傾喎）

第二日

S: 呀你記唔記得我係阿乜生呢我…
我: （打斷）記得。
S: 我咪約咗你十點既…
我: （打斷）係呀， 而家十點半
S: 係囉係囉，咁我想同你約番個時間，大約十一點左右…
我: 冇房可以傾嘢喎
S: 咁下晝
我: 下晝都冇房喎，你上黎的話我都係只可以同你企喺門口傾
S: 咁或者電話同你講番先啦，個價錢方面呢大約（quotation，下刪九百字）
我: OK，咁我同其他同事開會時傾下先，遲下再搵你
S: 係啦你哋傾下啦， 傾完我再上黎同你 finalize 佢，你都話過我哋個價錢係最抵啦…
我: 我冇咁講過喎

工作內容與封面不符

上一輩D人成日話︰ 後生仔出嚟做嘢，一有機會就乜都要試下，一有機會學嘢就做就要搶住嚟學。 我好同意架，所有當老細話呢份工有好多嘢學時，我都好樂意架。

不過，我亦好清楚知道，因為公司人手不足，所以好多估佢唔到嘅嘢會要我做，例如︰坐 reception。

老細︰嗱，當阿邊個冇返，而阿邊個又病咗時，你就要坐出去 reception 頂住喇。
我︰我冇所謂，不過好少見男人坐 reception 喎，俾客見到會唔會好奇怪呢？公司又唔係冇其他女同事。
老細︰坐 reception 幾好架，可以識多D人嘛。

「坐 reception 可以識多D人」呢個理由都俾佢諗到，我都冇理由唔坐出去喇卦。

當然，以上呢個係個別例子。但其實呢類中小企普遍一個問題就係分工唔清晰。或者有人會話，喂，話到明係中小企，資源梗係有限啦，人就梗係唔夠用啦，好明顯係你懶唔想做啫。

我覺得，我絕對唔介意做多咗嘢，但我幾介意叫我做份外事嘅同時又將我份內事 shift 俾另一個做。

不過其實好多公司，實際上工作分配如下︰

marketer 做 design / artwork 設計宣傳品
designer 做 sales 出去見客
sales 做 technical support 答客問題
technical support 做 QC 兼答客問題
programmer 做 marketing research 研究 industrial trend

當我自己做緊 artwork 嘅時候，見到其他同事做緊 market research，其實都幾奇怪，亦好肯定，大家嘅 performance 都唔會好得去邊。

唯一工作內容切合職務嘅，係老細負責簽支票，捨佢其誰呀？

一日只寫一份 Press Release

仲讀緊 marketing 嘅時候， 有一日下午去某公司拜訪個 PR。

我︰ 啱啱放學， 返埋個 part-time 就過黎搵你喇， 你好似好得閒咁喎， 今日攪咗乜？
PR︰ 哦冇， 今日寫咗一份 press release 囉。

當時我心諗， 今次冇讀錯科咯， 原來做 in-house marketing / PR 咁得閒， 一日寫一份 press release 咋， 我寫嘢一向都快， 一份關於公司 product 嘅 press release 我豪一個鐘出黎乜都寫完啦， 咁全日仲有咁多個鐘做乜呀？ 今次仲唔發達？

到畢咗業， 而家真係做 in-house marketer， 先至知道， 原來所謂嘅「一日一份 press」， 係， 冇錯， 不過， 其他時間一樣忙到冇停手， 但， 忙乜呢？ 又答唔出。

呢個永遠係 marketing 嘅一個問題， 特別係對中小企黎講， marketing 係一個幫公司使錢嘅職位。 試問中小企邊有咁多錢俾你使？ 而中小企嘅 in-house marketing， 麻煩你做完少少 marketing 份內事之後， 埋做埋多多 admin 份外事丫唔該。 或者係做完 admin 嘢， 辦公時間後先至去做 marketing 嘢丫唔該。 而且， sales 跟 marketing 永遠分唔清， 再者， 似乎公司對內對外樣樣都關你事， 但又好似冇權去做， 但職責上你唔做的話就冇人去做， 咁你做唔做？

一個初級 marketer， 其實係一個 computer operator + office admin， 而且兩者都係半桶水。 結果係， 日日都好似好忙， 日日都好多嘢做， 日日都 OT， 但， 似乎實際上乜都冇做過。

對我黎講， 我好清楚講得出 marketing 對一間公司嘅功用， 我好清楚我嘅職權係乜， 但， 我唔知我實際上每日做咗D乜。

或者係我其實乜都唔識。

Sale 屎呀 Sale 屎

通常每隔一兩日就會有一堆 sales 打黎公司， 通常， 都係一D 所謂「search engine marketing」既公司。 其實， 就係賣緊 google / yahoo search result 隔離既「sponsor link」， 基本上， 佢哋同一般雜誌廣告冇分別（某程度上雜誌廣告可能有效啲， 你估 web2.0 萬能咩）。 不過分別係， 有時呢堆自稱 google / yahoo reseller 既 sales 真係激死你。

#1
sales︰ 不如我上黎你度同你解釋吓啦
我︰ 你鍾意啦
sales︰ 你地公司地址喺邊？
我︰ 網頁有寫
sales︰ 不如你而家講我聽啦
我︰ …

#2
sales︰ 我都睇緊你哋個 web site， 你哋都係做 xxx 呢類高科技產品， 好適合放喺 google 度賣廣告架。
我︰ 哦
sales︰ 咦你哋呢類產品其實係乜嘢黎呢？
我︰ … 即係（下刪九百字）咁囉
sales︰ 哦， 我明喇， 即係好似 ABC 公司既產品咁囉
我︰ 唔好意思我哋就係 ABC 公司

#3
我︰ 呢類 search engine 廣告我地以前有試過， 但你哋 provide 既 report 同我哋 server 實際計出黎既數字差好遠喎
sales︰ 我哋公司唔會有呢個問題架， 我哋會每個月 provide 番個 report 俾你地講番到底個數據係點樣架
我︰ 我就係話緊你哋個 report 唔可信囉
sales︰ 冇問題架我可以 provide 埋我哋內部個 account 你 login 入去睇番個 report

#4
sales︰ 通常我都會建議番客人落一D專門少少既關鍵字， 咁樣得出黎既結果會好D
我︰ 我冇乜概念， 例如邊D呢？
sales︰ 例如「科研」呀， 「技術」呀咁囉

仲有最攪笑係通常佢哋都只會自稱「喂我係 yahoo 打黎架」， 永遠唔肯講自己係「yahoo 個 reseller XYZ 公司」， 結果只會係︰
sales︰ 喂我係 yahoo 打黎架， 上次打過黎同你傾過呢
我︰ 邊間 yahoo 呀？
sales︰ …我係 yahoo 個 reseller XYZ 公司
我︰ 哦係呀 XYZ 我記得你呀， 係呢上次傾緊…

回想苦難之開始

話說當日，我好心急搵工，話晒我只係做過幾份同本科無乜關係嘅工作，喺 Marketing 呢個行業來講，我真係一件 fresh grad，所以當阿姐喺 second in 兩個鐘頭後打來話請我嘅時候，我真係有少少意外嘅，事關我自覺運氣一直好差，開始咗搵工唔夠兩個星期就掂？自己都唔係好信，話晒我 interview 時都寸過個老細吖。

點寸法？

阿伯：最近你有無留意乜野時事呢？
我：(時為06年頭，當時真係無乜新聞)乜乜公司最近爆出勞資衝突啦，其實主要問題在於佢係公司主席同行政總裁集於一身，咁樣就公司管治來講係好大問題嘅…
阿伯：乜…你覺得主席同行政總裁集於一身真係好大問題…？
我：(開始聞到燶味)哦當然唔係啦，我都未講完。其實呢個好視乎呢位掌舵人嘅能力，正如 Bill Gates 以前都係集大權於一身，咁 Microsoft 發展都好好啦。其實呢樣嘢好視乎掌權嘅人嘅能力去到邊…
阿伯︰係囉，好多時讀書嘅嘢都唔適用於現實
我︰絕對同意，讀書只係教你理論，實際上做成點都要睇個人能力同應變能力。

就係咁，我入咗呢間公司度做，至於阿伯身份，當然都唔使多講啦。

而我當時唔知嘅係，我之後，有排捱。 

Email CC 遊戲

有人話 email 之發明有助環境， 因為節省紙張喎， 傻啦。 公司入面， 一旦遇到重要的 email， 你會點？ 當然第一時間 print 佢出來，
費事一陣又 down 機又錯手洗左， 係咪？ 只有一大堆 forward 再 forward 的爛 gap 你唔會 print。 咁， 又節省左幾多張紙？

計我話， email 最大貢獻係令你學識點樣玩 CC 遊戲。 一個 email， 不論內容重要與否、 收信人職位高與低， 都唔影響一個 email 的價值。 一個 email 的價值只在於佢 CC 左俾幾多人。 冇幾耐你會發現， 好多 email 入面 CC o個條友其實你唔識佢係乜水， 亦唔知佢係咪你公司同事， 更加唔知 email 入面講緊既 issue 關唔關佢事。 只會知道， 你 CC 俾越多人， 理論上越多人知你「做緊野」。

再過多一陣你會發現， 你公司得 100 人但你 CC 出去個 list 有 300 幾人。

我懷疑， 好多商業機密其實唔係商業間碟爆出來既。

SorrySillyson ︰ 2006-2010 年的產品預測（最新修訂版）

SorrySillyson， 一個公認走在潮流尖端的品牌， 在 2005 年的  Walkmen phone 成為首個以音樂為品牌的大熱手機 （假如不計 Motorola 的 E398 和 Nokia 的 MusicXpress），  在當今 iPod 年代， 將 20 年前的 walkmen 再拎出來獻世， 於然大受歡迎， 難怪有人話「香港只要肯做就一定發達」。2006 年將推出全新的  Cybershort phone  系列， 將 Sorry 旗下半生不熟的相機技術帶入手機

在 2005 的音樂年後， 2006 又回歸到攝影鏡頭像素年， Sorry 旗下有 Cyber-short， 當然一定要放入手提電話， 其偏色、 紫邊、變形效果， 直迫 LOMO 相機， 令拍攝者永遠不知道自己到底拍了些甚麼， 帶給用家無窮無盡的驚喜和樂趣。

以下是 2007 年至 2010  年 SorrySillyson 的產品預告︰

2007︰ Memorystick phone
既然滿足了各位影相玩鏡頭像素和音樂的欲望， 那麼手機內置的記憶體是不足夠使用的， 於是  SorryEricsson 便推出 Memorystick phone， 隨機附送高達 10 支不同種類的 Memorystick， 包括有元祖 MS、 MS Pro、 MS Duo、 MS Pro Duo、 MS Select、 MS Fast、 MS Faster、 MS Super Faster、 MS Super Faster XP 以及最新推出的 MS X2。 而本 Memorystick phone 則支援最最新推出的 MS X3（另購設備， 不會隨機附送， 將於 2008 年內推出， 敬請期待）

2008︰ Playstation phone
手機娛樂是世界大潮流， 走在時代尖端的 SorryEricsson 又怎會不明白用家的需要？ 於是我們推出結合 Playstation 和手機的 Playstation phone， 將家用遊戲帶到手機上。 Playstation phone 支援 PS1、 PS2、PS3 以及 PSP  （Portable Stupid Platform）的遊戲。 不過由於 PSP 的遊戲多是 PS2 的移植版， 而 PS2 的遊戲多數是 PS1 遊戲的續集， 而 PS3 的遊戲又多數是 PS2 的續集， 所以， Playstation phone 將會隨機附送 NDS Lite 以解用家不時之需。

2009︰  VAIO phone
繼音樂、 遊戲之後， 我們預計 Smartphone 將會是王道， 所以我們推出多功能電腦型的 VAIO phone， 為商務和潮務人士提供新選擇。 為了將 VAIO 的特色忠實地呈現， VAIO phone 將內置 WINDOWS VISTA， 並將 15″ 屏幕、 標準電腦鍵盤、 5.1 聲道喇叭、 DVD 燒錄（當然是 BLU-RAY， 不過 WINDOWS 只支援 HD-DVD）、 以及 10 合 1 MS reader等等放入手機內。 功能十分豐富， 可謂新一代型人的唯一選擇， 勢必帶領新一代個人通訊儀器的潮流。 另外， 基於體積上的考慮， 本手機將不會內置通訊模組， 如果用家想要通話功能， 可另購配件， 本公司推薦 NOKIA 和 MOTOROLA 推出的手機模組， 質素比較穩定， 話音清晰， 少斷線。

2010︰ AIBO phone
雖然 AIBO 已死， 不過既然連 walkman 都可以翻生， 那麼 AIBO 又有何不可？ 現代人傾向不生育， 所以 SorryEricsson 推出寵物手機 AIBO phone。 不時有人會投訴現代科技冷冰冰， 沒人情味。 所以本公司特別設計出一套手機專用的人工智能系統， 將人性帶入手機， 做到真正的「科技以人為本」。 AIBO phone 是現代人的最佳伴侶， 當你心情久佳， 可以對著 AIBO phone 的喇叭訴苦， 當你情緒高漲時， 亦可以帶著牠上街散步。 此外， AIBO phone 亦會表露出一般寵物的情緒， 例如會隨時向你撒嬌， 在撒嬌時並不會接聽任何來電， 而撥電話功能亦會暫停， 時間長短視乎你安撫牠的能力囉！

考試出貓

到底， 會考考宗教科時去廁所祈禱， 算唔算出貓？

MP3 鈴聲 vs CALL 機

以前 CALL 機年代， 所有機種都是清一色 BBB 的響聲， 當街上一 B 時， 所有機主即是 check 機， 場面壯觀。 

後來有了和弦鈴聲， 最大用處是令大家的手提電話不會完全一模一樣， 令有電話響時， 大家可以分別出是誰的電話在響。

到了現在， 更進一步有了 MP3， 不過， 當人人都一模一樣用光良的第一次童話約定時， 現在電話一響， 大家又回到 CALL 機年代了。

不要在 IKEA 開房

假日行 IKEA， 永遠會看見一個景象， 就是你想看的傢俬上面一定會有一件或多件人類物體橫陳在上。 更甚者， 有情侶兩人躺在床上， 半蓋著被， 男的打電話， 女的摸面， 完全賓至如歸、 旁若無人、 忘我境界、 屋企一樣、 十分難頂。 行多兩步， 又會看見一對情侶坐在梳化上重覆上述動作， 我不禁問︰ 係咪同一 pair？

所以， 如果想攪野， 請返屋企攪， 如果 IKEA 佈置比貴家居令你更有屋企的感覺， 也請暫時忍耐一下並移玉步至就近之酒店 / 賓館， 總之， 無需公開示範。

搵食艱難，有辦你睇

辭職信示範

敬啟者︰

由於本人做得十分不爽，所以不幹了。

求職信示範

Hi there,

I want to be get in your company. When I am was small, I was studing in Ho Man Tin Po Leung Kok Mr. Chan Tai Man Memorial Group of School the 2nd 3rd Primary School (Morning Class). In primary 1, I got 100 marks in my English dictation and my teacher Miss Wong said I am a good student! I was so happy!!!

When I grew bigger, I was in secondary school and I studied 3 years Form 1, 2 years Form 2, 4 years Form 3 and 2 years Form 4. Then I go went to a factory to be the sales people. I was very hard working, usually I went yp to work at 9:00am (sometimes 9:16am) and go to work until 6:30pm (sometimes 5:49pm), I learnt how to turn on and tuen off the machines, it’s great!

Anyway, I think I an am a good guy and I will make your company very good. You better consider my application, otherwise, you will regret if you reject me, so be careful!

If you think your company really want me, please call my new mobile phone (Sorry-Ericsson W167i, very chiu bao) number 98xxxxxx. Don’t call me before 3:00pm, I haven’t get up yet!

Yours

Ng Lang Dak 

Real Life Marketing

	課本上	現實中
決定是否要進入該市場	Internal analysis / External analysis / SWOT / Resource planning/ …..	對手做， 即跟風
Evaluation	分析 sales / customer feed back / price change / …	分析老闆面色
Crisis Management	第一時間向公眾發佈事實之全部	第一時間向上級推卸責任之全部
廣告	最重要讓目標觀眾看到	最重要讓老闆看到
公關	任何時候與傳媒打好關係	在有需要找幫忙時與傳媒打好關係
Market Research	詳細分析數據然後作決定	詳細分析自己的需要然後決定數據

其他想到再寫…

生佢出黎， 害佢一世

對一個人最大的作弄莫過於把他生下來，
對一個人最大的報復莫過於投胎做他的子女。

蝴蝶效應

如果一隻蝴蝶在非洲拍拍翅膀可以引起美洲颱風，

那麼一個人類揮手應該可以引起颶風，
一個人走路應該可以引起大陸版塊移動從而引致地震。

所以， 做隱蔽青年有助世界和平。

超級舊作︰ 50個不交功課的藉口

記得大約係 1998-1999 年左右作品， 當時放於自己個網頁內， 不過咁耐以黎總會不定時收到 email forward 呢篇文章， 又或者某 forum 會見到， 其實我當時都係參考「麥嘜寫法」， 都係一條橋用唔同字眼重覆寫。

不過見既然過咁多年都仲有人睇， 証明仲有市場， 所以自己都 post 番出來先， 唔好執輸。

其他人意見， 多數鍾意 #42 & #50， 其實我自己最鍾意 #49。

50個不交功課的藉口

1) 唔記得.

2) 記得不過唔想做.

3) 唔識做.

4) 唔鍾意做.

5) 老豆唔肯幫我做.

6) 大哥尋日冇返屋企,冇人幫我做.

7) 掛住打機,冇做.

8 ) 掛住陪男/女朋友,冇做.

9) 要陪隻狗,冇做.

10) 乜要做咩?我唔知喎…..

11) 冇寫低要做.

12) 尋日冇返學,唔知要做.

13) 尋日走左堂,唔知要做.

14) 上堂時訓左,聽唔到你話要做.

15) 你話做我就做,咁我咪好冇面?

16) 我唔妥阿sir你所以至唔做,其他阿sir既功課我交齊架.

17) 我唔鍾意呢科.

18) 阿sir你樣衰.

19) 我冇買書,做唔到.

20) 我冇買簿,做唔到.

21) 我有做,不過冇帶返黎.

22) 我有做,不過俾隻狗食左.

23) 我有做,不過俾細佬畫花左.

24) 借左俾阿邊個抄,佢未還.

25) 尋日屋企火燭.

26) 尋日屋企水浸.

27) 尋日格離屋火燭.

28) 點解冇做?因為冇做..

29) 今日要交?乜唔係下個月先要交咩?

30) 去左補習, 冇時間做.

31) 我仲以為阿sir冇返唔使交.阿sir你太令人失望啦….

32) 太多其他功課,做唔哂.

33) 冇乜其他功課,冇心機做.

34) 尋日阿三叔公八姨婆五姑姐六舅父一齊生日,連續飲左五餐.

35) 尋日阿三叔公八姨婆五姑姐六舅父一齊黎左我屋企打牌.

36) 尋日阿媽打牌三缺一, 我冇理由唔孝順佢呀….

37) 要搞open day.

38) 要搞swimming gala.

39) 要搞sport day.

40) 要練校隊.

41) 阿sir你細個讀書都試過唔交功課啦, 而家咪係咁….

42) 唔交功課好小事,阿sir你唔好大驚小怪.

43) 唔交功課冇所謂,會考考得好就得啦!

44) 之前個兩堂既阿sir睇實哂, 抄唔到功課.

45) 冇人肯借功課我抄.

46) 今朝太遲返, 抄唔切.

47) 人生得意須盡歡……所以我尋日去左玩.

48) 整homepage, 冇時間.

49) 做唔哂功課我都照返學, 阿sir你仲有咩不滿?

50) 律師黎之前我有權唔答你